Tragjedia e Velipojës, ku vdiq babai, Edmond Preka bashkë me dy fëmijët e mitur, Kejsi 5 vjeç dhe Rajan 9 muajsh ka prekur mijëra zemra, të njohur e të panjohur të familjes. Makina me të cilën udhëtonte familja 5 anëtarëshe u përplas tragjikisht me një mjet tjetër, duke shënuar tragjedinë me 3 viktima. Është duke luftuar me vdekjen, Noemi, vajza tjeter e familjes, 10 vjece. Ndërsa nëna e tyre, Evisa Preka 37 vjeçe është përmendur, pra e ka kaluar rrezikun për jetën.
Mes shumë e shumë mesazheve ngushëlluese, veçojmë ngushëllimin dhe lutjen e priftit të katedrales së Shkodrës, Vlash Palaj për jetën e Noemit.
Nga Dom Vlash Palaj
Shumë të dashtun e të nderum miq,
Sapo u ktheva nga Velipoja që kurrë nuk e pash ma ngusht, ma në zi e ma të plagosun.
Kërkoj lutjen Tuaj për jetën e Noemit 10 vjeç, që humbi baben, vëllain e vogël e motren, ndasht Zoti ta ruajë në jetë si dashninë e vetme të mbetun të nanës. Lutjen tuaj…, për gjithë atë popull të përlotun, të gjunjëzumë dhe në zemer të plagosun. Kryqi i kësaj ngjarje peshon ma shumë se mund të bajne familjarët… Le të shpresojnë edhe njëhere se bijtë e saj, engjëjt e pafajshëm, nuk mund të treten në errësinë apo në asgja… por shpirti i tyne kjoftë i perqafumë nga krahët e mëshirshëm dhe të mirë të Zotit. Kurrë nuk do të dyshoj se Dashnia gjithmonë do të ngadhenjejë mbi vdekjen!
