13 vite pas tragjedisë së Otrantos sillet në Shqipëri për të vuajtur dënimin Elton Tafili. Ai është ekstraduar nga Italia, pas një urdhër-arresti ndërkombëtar lëshuar për të, pasi rezulton i dënuar me 20 vite burg nga Gjykata e Vlorës.
Elton Tafili, 38 vjeç u arrestua në prill të vitit të kaluar në qytetin e Milanos, pikërisht për faktin se është i dënuar me 20 vite burg nga drejtësia shqiptare për trafik të qenieve njerëzore me qëllim emigracionin klandestin.
Gjykata e Vlorës në vitin 2006, e akuzoi Elton Tafilin si një nga skafistët që drejtonin gomonen me 39 persona që më 9 janar të vitit 2004 u mbyt në ujërat e kanalit të Otrantos, ndërsa udhëtonte nga Shqipëria drejt Italisë.
Nga kjo tragjedi mundën të shpëtojnë vetëm 11 persona, 6 prej të cilëve ishin skafistë e mes tyre dhe Elton Tafili. 28 persona mbetën të mbytur e 7 prej tyre nuk iu gjetën trupat kurrë.
