Të paktën 40 njerëz janë vrarë nga një sulm ajror që goditi një qendër të ndalimit të emigrantëve në Libi. Ndërsa 80 të tjerë janë raportuar të jenë plagosur në shpërthimin që ndodhi në një objekt në periferinë lindore të kryeqytetit Tripoli. Shumica e të vrarëve raportohet të jenë emigrantë afrikanë.
Në vitet e fundit, Libia ka qenë një trampolinë kryesore për emigrantët që kërkojnë të udhëtojnë në Evropë. Vendi është shkatërruar nga dhuna dhe ndarja pasi që sundimtari i gjatë Muamar Gadafi u rrëzua dhe u vra në vitin 2011.
Osama Ali, një zëdhënës për shërbimet emergjente, tha për AFP se 120 emigrantë kishin qenë në një hangar i cili ishte goditur drejtpërdrejt nga sulmi. Ai shtoi se më shumë njerëz mund të jenë vrarë sepse numri i të vdekurve deri më tani ishte “një vlerësim paraprak”.
Qeveria e Marrëveshjes Kombetare (GNA) e cila mbështetet nga OKB-ja, e udhëhequr nga kryeministri Fayez al-Serra, ka fajësuar ushtrinë kombëtare të Libisë (LNA) për sulmin e së martës në periferinë e Tajoura. Në një deklaratë, ai tha se sulmi ishte “i paramenduar” dhe “preciz” dhe e denoncoi atë si një “krim të urryer”.
Mijëra emigrantë që përpiqen të udhëtojnë për në Europë mbahen në qendrat e paraburgimit të qeverisë, të tilla si kjo, të cilat shpesh ndodhen afër vijave të para të konfliktit. Kushtet e këqija të këtyre qendrave janë kritikuar nga grupet e të drejtave të njeriut. Bashkimi Evropian ka rritur bashkëpunimin me rojet bregdetare libiane për të kapur anijet emigrante. Por bandat e kontrabandës së njerëzve kanë lulëzuar në kaosin politik të vendit, duke i bërë emigrantët e dëshpëruar të paguajnë mijëra dollarë për kokë. /Opinion.al
