Një ngjarje tejet e rëndë ka ndodhur në qytezën e Belshit. Një djalë 12 vjeç është gjetur i vetëvarur të mërkurën në mesditë. Ai është kthyer në shtëpi pas mësimit dhe në momentin që familja do të shtronte drekën është vënë re mungesa e tij.
Mësohet se trupi i pajetë u gjet nga nëna në një nga trarët e kasolles së bagëtive. Edhe pse në gjendje mjaft të shokuar, prindërit e fëmijës janë marrë në pyetje nga policia.
“Asnjëherë nuk kemi vënë re shenja që fëmija ynë të ishte i ngarkuar psikologjikisht. Asnjëherë nuk e kemi keqtrajtuar apo t’i kemi bërtitur. Si çdo prind kemi kërkuar më të mirën për fëmijën tonë. Nuk kemi asnjë dyshim, nuk dimë si ta quajmë këtë tragjedi”, – kanë pohuar prindërit.
Sakaq as mësuesja nuk ka hedhur dritë mbi ngjarjen duke thënë se 12 vjeçari, nxënës i klasës së 6-të ishte fëmijë i qetë dhe i shoqërueshëm.
Policia dyshon se një nga shkaqet mund të ketë qenë një depresion i çastit, gjithsesi hetimet vazhdojnë për të zbardhur të plotë ngjarjen. Burimet thanë se kufoma nuk kishte shenja dhune, veç shenjes së litarit në fyt. Pra sipas tyre bëhet fjalë për vetëvarje, por rrethanat dhe shkaqet jane ende të panjohura.
