Kushdo që udhëton në Tiranë këto ditë me siguri ka mbetur me orë të tëra në trafik. Ndërsa policia rrugore për herë të parë deklaroi se është e pafuqishme për ta menaxhuar për shkak të punimeve që janë hapur në qendër dhe jo vetëm, kryebashkiaku Erion Veliaj thotë se trafiku është i pashmangshëm në një qytet ku ka 1 milionë banorë. Ai në asnjë rast nuk pranoi fajin e bashkisë për këtë gjendje, gjatë një interviste që tha mbrëmë për Sokol Ballën në Top-Channel. Për Erion Veliajn faji është i qytetarëve që lëvizin me makina, duke u sugjeruar atyre biçikletat. “Qyteti është bërë për 170 mijë njerëz, jo për 170 mijë makina”, tha ai.
Veliaj është pyetur edhe me marrëdhënien me ministrin e Brendshëm, Saimir Tahiri, për të cilin tha se nuk e kam rival. Ndërsa për synimet në politikë, Veliaj la të kuptohet se dëshiron dhe një mandat tjetër në krye të Bashkisë së Tiranës.
Më poshtë pjesa e intervistës së Veliaj ku flet për trafikun në Tiranë dhe marrëdhënien me Saimir Tahirin
Le të flasim pak për trafikun. Trafiku është rënduar në kryeqytet, aq sa pak ditë më parë edhe policia u dorëzua dhe tha që nuk ka çfarë të bëjë.
Erion Veliaj: Secili duhet të bëjë detyrën e vet. Të kuptojmë që në një qytet me 1 milionë banorë do të ketë trafik. Do të thotë që me njerëzit që vijnë për festa, me ata që e përdorin si tranzit, shumë lëvizje që mund të bëhen me biçikletë, ose këmbë, besoj që një qytet i këtyre përmasave ka këtë lloj trafiku. Nëse njerëzit duan një qytet që s’ka trafik, do të thotë që është një qytet që nuk ka jetë, s’ka biznes.
170 mijë makina në Tiranë, nëse flasim për 20 mijë të tjera shtesë cdo ditë që vijnë nga rrethet dhe që flasim për këto ditë feste, flasim për gati 300 mijë makina, ju përuruat aksin e ri pas INSIG-ut dhe sërish duket sikur asgjë nuk ka ndryshuar?
Erion Veliaj: Ajo që duhet të ndryshojë nuk është vetëm infrastruktura, por edhe kultura e mënyra sesi ne e përdorim makinë. Ky është një qytet që është ndërtuar për 170 mijë banorë, jo 170 mijë makina.
Ky nuk është justifikim për një person që votohet si një menaxher i ri me ide të reja, siç ishte Pazari i Ri.
Erion Veliaj: Asnjëherë nuk kam thënë që do të zhduket trafiku në Tiranë sepse përsa kohë është zemra e Shqipërisë, është kthyer në vendin e suksesit, nëse dikush do të bëjë jetën e vet aktive në Tiranë do të paguajë edhe këtë çmimin e transportit duke qëndruar në trafik. Do jetë një çmim përsa kohë shumë prej nesh, unë i pari nuk përdorim biçikletën dhe ecjen në këmbë në një vend që ka 300 ditë diell.
Pavarësisht se janë shtuar, rrugët për biçikleta nuk janë mjaft. E dyta transporti publik është ai që është dhe e treta janë disa akse që nuk kanë përfunduar, si rruga e re që do të shkojë nga Sauku tek Qyteti i Nxënësve, e që do të përfundojë para qershorit, por deri atëherë, Tirana po vuan në mënyrë ditore, është kthyer në një gangrenë dhe të bllokosh në këtë moment sheshin Skënderbej, i bie që të krijosh me ose pa dashje një ngjeshje më të madhe në trafik?
Erion Veliaj: Në Tiranë vetëm 17 përqind e njerëzve janë pronarë të një makine. Po 83 përqind e njerëzve që nuk kanë makina, nuk meritojnë të kenë një shesh?! Këta që ecin, prindërit tanë që nuk kanë makina, ata që duan të përdorin sheshin Nënë Tereza për të luajtur me fëmijët, ata që duan më shumë hapësira të gjelbërta?!
Më bëri shumë përshtypje deklarata e policisë për trafikun në Tiranë, si janë raportet tuaja më ministrin e Brendshëm? Shiheni të dy si mbështetës të Edi Ramës dhe ai ju ka mbështetur, por flitet për një rivalitet mes ju dyve për të ardhmen e PS.
Erion Veliaj: Ne nuk kemi asnjë rivaliteti. Jemi të fokusuar tek bashkëpunimi që kemi për menaxhimin e qytetit sepse na bie barra të dyve, përfshirë edhe punën e trafikut.
Aty u duk sikur ka patur pak…pra një polici që thotë unë dorëzohem! Nuk ka çfarë t’i bëj trafikut, duket sikur ua lë peshqesh juve, pra realisht qytetarët duan të dijnë sa ndikojnë këto fërkime të supozuara në menaxhimin e qytetit.
Erion Veliaj: Detyra jonë është të mos dorëzohemi, që të mendojmë për një zgjidhje. As unë, as Sajmiri nuk jemi dorëzuar. Ka trafik, por fundi i vitit ka qenë gjithmonë kështu. Gjithmonë themi që është ndryshe, por gjithmonë kështu ka qenë.
Cila është e ardhmja e Erion Veliajt?
Erion Veliaj: E ardhmja ime është në bashkinë e tiranës. Do shfrytëzoj maksimalisht të gjithë besimin që më japin qytetarët për ta cuar tiranën në shekullin e ri. Nuk është ende aty ku duhet. Disa gjëra kemi zgjidhur.
Gjithë ky investim i madh i juaji, duket e pamundur që të ndaloni projektin tuaj politik vetëm tek Tirana?
Erion Veliaj: Tirana është ajo me të cilën zgjohem çdo mëngjes. Ky është pasioni im, ky është fokusi im.
Sheshi Nënë Tereza ka qenë vazhdimisht i mbyllur këtë vit. Keni një park lojrash sot këtu, por ndërkohë qarkullojnë zëra që parku tradicional i lojrave, ai tek Rruga e Elbasanit do të zhduket.
Erion Veliaj: Nuk është kështu. Sheshi Nënë Tereza ka qenë vetëm një rrethrrotullim dhe nuk ka banorë në të. Më duket e paarsyeshme që Sheshi Nënë Tereza të kishte funksion vetëm rrotullimin e makinës. Kemi përdorur këto hapësira për t’i dhënë frymëmarrje qytetit. Sheshi tek 7 Xhixhat është një nyje që ka shumë trafik, është hapësirë e dhënë me qira nga shtetit dhe nuk më rezulton ndonjë kënd lojrash kushedi se çfarë. Ajo që propozojmë është që ta rimarrë Bashkia e Tiranës. Bashkia e Tiranës ka një ide që të bëjë nën tokë një parkim nëntokësor dhe mbi një kend lojrash shumë më të bukur nga ai që kemi sot, ku përfiton vetëm një privat.
/Opinion.al
