Policia spanjolle ka shkatërruar një bandë shqiptaro-bullgare e cila merrej me trafikimin e drogave të forta nga Turqia dhe Ballkani, kryesisht heroinë.
Operacioni policor i zhvilluar të mërkurën, 17 gusht 2016, ka çuar në pranga 7 persona. Policia nuk ka bërë të ditur emrat e të arrestuarve, por mësohet se kanë qenë prej disa kohësh nën përgjim nga autoritetet.
Në krye të rrjetit qëndronte një shqiptar me një histori të gjatë kriminale.Banda kishte ngritur një laboraror për përpunimin e heroinës në fshatin Gava të Barcelonës.
Policia gjeti dhe sekuestroi në ambjentet e laboratorit 38 kg heroinë të pastër, 8 kilogramë kokainë, 50 kilogramë kimikate të përdorura për prerjen dhe përpunimin e drogës, një pistoletë me silenciator, municione, etj.
Krahas drogës, në cilësinë e provës materiale policia sekuestroi para, 10 automjete, telefona dhe kompjutera të përdorur për komunikim, dokumente në lidhje me ngjarjet nën hetim, etj.
Nga hetimet e deritanishme mësohet se droga sigurohej nga shqiptarët të cilët drejtonin dhe rrjetin e trafikut, ndërsa bullgarët merreshin me shpërndarjen e saj.
Siç bën me dije policia spanjolle në komunikatën për mediat, anëtarët e bandës ishin të stërvitur mirë ushtarakisht dhe kishin disiplinë të rreptë.
Lëvizjet e tyre ishin të mirëkordinuara, ata përdornin sisteme të sofistikuara komunikimi.
Operacioni i policisë spanjolle ështrë mbështetur nga Europol dhe policia shqiptare.
Kjo e fundit ende nuk ka dhënë detaje për operaconin e zhvilluar një ditë më parë.
