Një prokuror po ashtu ka rënë në rrjetën e përgjimeve, në lidhje me mega operacionin që u zhvillua për trafikun e drogës nga Shqipëria në Greqi.
Bëhet fjalë për prokurorin e Gjirokastrës, Spartak Çoçoli, i marrë fillimisht në pyetje në janar të këtij viti nën dyshimet për korrupsion dhe i lënë nga gjykata me masë sigurimi “detyrim paraqitjeje”.
Këtë të martë policia bëri të ditur se si u identifikua si pjesë e hetimeve mbi një organizatë të madhe të trafikut ndërkombëtar të drogës. Policia njoftoi përfundimin e një operacioni 10 mujor, që solli ndalimin e 14 personave në qytete të ndryshme të vendit dhe u sekuestrua mbi një ton kanabis e një kilogram heroinë e kokainë.
“Në kuadër të këtij hetimi u evidentua një rast i dyshuar korrupsioni në sistemin e drejtësisë. Në datë 24 janar 2019 u ndaluan shtetasit E. H., banues në Tiranë dhe E. D., banues në Përmet, si dhe u procedua masa e sigurimit personal “Detyrim për t’u paraqitur në policinë gjyqësore” dhe “Pezullim i ushtrimit të detyrës publike” i shtetasit S. Ç., banues në Gjirokastër (Prokuror pranë Gjykatës së Shkallës së Parë Gjirokastër)”, theksohet në njoftimin e policisë./ Opinion.al
