Një 49-vjeçar shqiptar banues në Anderlecht, Belgjikë rrezikon gjashtë vite burg, pasi akuzohet për kontrabandë të qenieve njerëzore.
Në shkallën e parë ai u dënua me 15 muaj burg, sepse gjykata gjeti prova vetëm për 4 persona të kontrabanduar, nga 19 gjithsej për të cilët akuzohej.
Më 18 shtator 2020 dhe 22 janar 2021, përkatësisht katër dhe gjashtë shqiptarë u gjetën në një rimorkio në portin e Zeebrugge. Nga kontrolli i bërë në celularët e tyre rezultoi se ata ishin në kontakt me Aleks B., 49-vjeçarin shqiptar, i cili prej 21 vitesh jeton në Anderlecht pa dokumente qëndrimi dhe u arrestua në gusht 2021.
49-vjeçari mësohet se ka kontrabanduar gjithsej 19 persona në Mbretërinë e Bashkuar. Por gjykata ka konstatuar vetëm faktet e 18 shtatorit 2020 për katër persona dhe e ka dënuar me 15 muaj burg dhe 32 mijë euro gjobë.
Aleks B. ishte dënuar tashmë me dy vjet burg për kontrabandë të qenieve njerëzore në vitin 2014.
Mediat e huaja informojnë se prokuroria ka gjetur edhe rastet e tjera të kontrabandës të vërtetuara në bazë të hetimeve telefonike, ndaj edhe kërkoi 6 vjet burg dhe 152 mijë euro gjobë./Opinion.al
