Një 63-vjeçar është vënë në pranga nga policia pasi dyshohet që të ketë strehuar në ambientet e hotelit të tij, emigrantët sirianë të cilët u shpëtuan të premten në grykëderdhjen e Vjosës.
Sipas policisë është arrestuar shtetasi me inicialet F. D., 63 vjeç, banues në Tiranë. Autoritetet njoftojnë gjithashtu se gjatë kontrollit në ambientet e hotelit të tij janë gjetur të strehuar edhe 9 klandestinë të tjerë.
Njoftimi i policisë
Në vijim të operacionit të përbashkët të zhvilluar mbrëmjen e djeshme, për parandalimin dhe goditjen e tentativës për kontrabandim në drejtim të Italisë, të migrantëve nga vendet e treta, në grykëderdhjen e lumit Vjosë.
Vihet në pranga një nga autorët e përfshirë në këtë veprimtari kriminale.
Specialistët e Seksionit për hetimin e Trafiqeve dhe Narkotikëve në DVP Vlorë, në bashkëpunim me Departamentin e Policisë Kriminale dhe DVP Tiranë, arrestuan në flagrancë shtetasin F. D., 63 vjeç, banues në Tiranë.
Nga hetimet dhe provat e siguruara ka rezultuar se ky shtetas ka strehuar në ambientet e hotelit në pronësi të tij, migrantët e evakuuar gjatë operacionit të djeshëm.
Gjithashtu, gjatë kontrollit të ushtruar në ambientet e hotelit janë gjetur të strehuar dhe 9 klandestinë të tjerë.
Strukturat hetimore të Drejtorisë Vendore të Policisë Vlorë, nën drejtimin e Prokurorisë, vijojnë punën për identifikimin dhe gjetjen e personave të implikuar në këtë veprimtari kriminale.
Materialet iu referuar Prokurorisë, për veprën penale ”Dhënie Ndihmë për Kalim të Paligjshëm Kufiri” e kryer ne bashkepunim./Opinion.al
