Prokurori i Matit, Abaz Muça, është përballur me një situatë të pazakontë teksa ishte nisur drejt fshatit Myzë të Matit, ku u zbuluan e asgjësuan 10 600 rrënjë kanabis. Duke qenë se informacioni i dhënë nga strukturat e sigurisë ishte operativ, dhe bënte fjalë për dyshime mbi implikimin e policëve të caktuar, prokurori i Matit ka vendosur të verifikonte të vërtetën me qëllim që më pas të kryente veprimet e nevojshme hetimore.
Ai është nisur ditën e djeshme i shoqëruar nga një hetues për në zonën e fshatit Myzë, njësia administrative Lis, në Bashkinë e Matit. Gjatë rrugës për në vendin ku dyshohej se kultivohej drogë, në një zonë pranë fshatit, një automjet tip “Toyota”, fuoristradë, i ka prerë rrugën makinës ku ndodhej prokurori me gjithë hetuesin e çështjes, raporton Panorama.
Prej saj ka dalë një person i armatosur me kallashnikov, i cili ka bllokuar rrugën. Pas një debati për rreth 15 minuta, personi me armë nuk jepte shpjegime se pse pengonte lëvizjen në rrugë. Për këtë arsye, prokurori me oficerin janë kthyer mbrapsht dhe kanë njoftuar policinë. Forcat e rendit të shoqëruara edhe nga FNSH, në prani të prokurorit, kanë shkuar në zonën ku kultivohej kanabisi dhe kanë gjetur parcelat e mbjella me 10600 rrënjë.
Nuk ka ende asnjë deklaratë nga Prokuroria mbi këtë ngjarje të paprecendent.
*Foto ilustruese nga asgjesimi i droges
