Autostrada Tiranë-Elbasan është mbingarkuar nga trafiku edhe këtë të Shtunë. Radha e gjatë e automjeteve vërehet në përfundim të kësaj autostrade pikërisht në vendin ku ngushtohet rruga në rrethrrotullimin e Bradasheshit.
Shkak i radhëve që shpesh kapin kilometra, është dyndja drejt Korçës dhe verilindjes për festën e Pashkëve. Siç duket edhe nga këto pamje të filmuara pasditen e së Premtes radha e automjeteve ka qenë kilometrike.
Të gjithë qytetarët që kishin vendosur me familjet e tyre të udhëtonin drejt jugut dhe juglindjes për festën e Pashkëve ose për në pikat kufitare me Greqinë u është dashur të presin mbi 1 orë në këtë trafik të rënduar. E njëjta situatë vijoi deri në orët e mbrëmjes. Kthimi i autostradës së vetme që lidh qendrën me juglindjen e vendit nga 3 korsi në 1 të vetme krijon mbingarkesën. Rritja e volumit të makinave që i drejtohet juglindjes prodhon pothuajse çdo ditë këtë varg të gjatë makinash. Më e rëndë situata është gjatë fundjavës apo kur ka festa zyrtare.
Zgjidhja për këtë situatë pritet të jetë Unaza e Elbasanit, studimi i së cilës është kryer dhe ndodhet në fazën e negocimit për gjetjen e financimit. Bypassi i Elbasanit do të nisë në zonën ku përfundon autostrada me Tiranën dhe do të bashkohet në pjesën lindore të qytetit me aksin Elbasan-Përrenjas që po i nënshtrohet një tjetër investimi për zgjerimin e tij.
