Një operacion i përbashkët i policisë greke dhe asaj shqiptare ka shkatërruar një organizatë kriminale të trafikut të armëve dhe municioneve nga Shqipëria drejt Greqisë.
Sipas policisë greke organizata përbëhet nga 16 anëtarë, 11 grekë dhe 5 shqiptarë. Ata ishin të ndarë në dy grupe ku njëri vepronte në Shqipëri dhe ishte përgjegjës për grumbullimin e armëve dhe municioneve, të cilat më pas transportoheshin në ishullin e Kretës në Greqi.
Pasi porositej numri i caktuar i armëve, organizohej punë për gjetjen e tyre në Shqipëri. Nga të dhënat hetimore rezulton se që prej Nëntorit të vitit 2018 e deri më sot, ky grup ka kryer të paktën 4 raste të trafikut të armëve dhe municioneve nga Shqipëria drejt Greqisë. Numri i saktë i armëve është i paspecifikuar.
Nga operacioni policor ranë ën pranga 6 vetë dhe 10 të tjerë janë shpallur në kërkim. Gjithashtu u sekuestruan automjete, kallashnikovë, pushkë dhe 122.566 fishekë. Përfitimet e organizatës nga ky aktivitet i paligjshëm janë përllogaritur në rreth 232 mijë Euro. /Opinion.al
