Gjykata e Tiranës la në burg pa afat 5 personat e arrestuar në Shqipëri për trafik armësh. Në qeli u lanë Endri Papa, Aurel Manreka, Gersi Llozha, Kleu Mucalliu dhe Tonin Shkami, të cilët akuzohen se janë pjesë e një rrjeti të trafikut ndërkombëtar të armëve.
Mësohet se gjatë seancës ata kanë pretenduar se nuk janë përfshirë në trafikun e armëve dhe nuk kanë pasur dijeni për aktivitetin e Valter Osmani. Në banesën e këtij të fundit në Kombinat është dokumentuar se kryhej procesi i shkëmbimit të armëve me kokainë.
Të arrestuarit pretenduan se e vetmja akuzë që mund të qëndrojë në këtë rast është ajo e prodhimit dhe shitjes së armëve.
Në total në Shqipëri dhe Kosovë u sekuestruan 64 armë zjarri dhe mbi 1 kilogramë kokainë, të cilat trafikoheshin përmes autobusëve të linjës Prishtinë-Tiranë dhe anasjelltas.
