Gjykata e Tiranës ka liruar nga paraburgimi katër të dyshuarit për çështjen e pagëzuar me emrin “Toyota Yaris”, ku në dy automjete u kapën 3.4 milionë euro.
Alban Mollaymeri, Agim Cekaj, Klevi Cani dhe Edi Lika kanë marrë masën “detyrim paraqitje” nga “arrest me burg” që ishte vendosur disa muaj më parë”. Kjo masë është vendosur gjithashtu edhe për dy kushërinjtë Alfred dhe Elvis Vladi të cilët janë në kërkim.
Më 6 nëntor 2019, Gjykata e Krimeve të Rënda vendosi që katër të arrestuarit të liheshin me “arrest shtëpie” duke ndryshuar masën “arrest me burg”. Por ky vendim u rrëzuar më 27 nëntor nga Apeli i Krimeve të Rënda duke i kthyer sërish në burg të pandehurit.
Megjithatë me vendimin e sotëm Gjykata e Tiranës ka vendosur që ti lirojë përsëri katër personat e ndaluar. Ata akuzoheshin për pastrim parash, armëmbajtje pa leje, falsifikim të monedhave dhe grup të strukturuar kriminal. Në vendimin e sotëm ka ndryshuar gjithashtu kualifikimi i akuzës nga “pastrim i produkteve penale” në “mosdeklarim i të hollave në kufi”.
Në lidhje me këtë çështje janë shpallur në kërkim dy kushërinjtë Alfred dhe Elvis Vladi. Ata kërkohen nga autoritetet belge për veprat penale të sipërpërmendura.
Për këtë çështje ka dëshmuar në Prokurorinë e Krimeve të Rënda, në praninë e prokurorëve belg edhe kreu i opozitës Lulzim Basha. Ai u pyet pasi në një nga seancat plenare iu drejtua kreut të Grupit socialist Taulant Balla: “njëri prej atyre që zgërdhihen më shumë ka qenë në Gjermani para tre ditësh. Mbajeni mend këtë që po ju them. Dhe ka porositur një Toyota Yaris, por ta kanë zbuluar Toyotën, o zgërdhimtar, bashkë me 1.5 milion euro të drogës brenda”.
Qershorin e kaluar autoritetet në Shqipëri zbuluan 3,366,700 euro dhe 80 mijë franga zvicerane brenda dy automjeteve Toyota Yaris të cilat ishin në një kontenier me 9 makina që vinin nga Belgjika. /Opinion.al
