Prokuroria e Krimeve të Rënda ka vendosur sekuestro preventive në disa pasuri të paluajtshme dhe llogari bankare të personave të përfshirë në çështjen e quajtur “Toyota Yaris”.
Pronat dhe pasuritë e sekuestruara janë në pronësi të Alban Mollaymerit, Alfred Vladit, A. D., Gj. C. dhe K. M.
Konkretisht bëhet fjalë për një shumë prej 72 mijë eurosh në llogarinë e Shoqërisë me inicialet “TRC” sh.p.k, pranë një banke të nivelit të dytë. Dy sipërfaqe ranishte nga 11,167 m2 dhe 140 m2 në fshatin Draç, Ishëm, në Gjirin e Lalzit si dhe një tokë arë 873 m2 në të njëjtin fshat.
Në sekuestro u vendosën gjithashtu një truall me sipërfaqe 404,5 m2 + godinë banimi 2 katëshe, sipërfaqe banimi kati përdhe 147,6 m2, sipërfaqe verandë + shkallë 10,9 m2 + sipërfaqe banimi kati i parë 158,5 m2, e ndodhur në Njësinë Bashkiake 11 në Tiranë.
Çështja e njohur si “Toyota Yaris” ka të bëjë me sekuestrimin e 3.4 milion eurove në portin e Durrësit në 2018.
Për këtë ngjarje janë arrestuar katër persona në Shqipëri, Edi Lika, Klevi Lika, Agim Ceka dhe Alban Mollaymeri. Ndërsa janë proceduar në Belgjikë Alfred Vladi, Elvis Vladi, Edi Lika, Agim Ceka, Alban Mollaymeri, Niman Nimani, Alman Nimani, Albana Vladi, Arianit Nimani, Drita Sopo dhe Driton Hakaj. /Opinion.al
