Kryetarja e forcës politike “Lëvizja për ndryshim” Jozefina Topalli, tha në “Opinion” se vazhdon të komunikojë me zotin Berisha, por u shpreh se vendimi për të krijuar një forcë politike ka qenë krejtësisht një reflektim i saj.
Më shumë se një herë, Topalli foli për largimin e tre kryetarëve aktualë të partive kryesore në vend, ndërsa deklaroi se ishte e gatshme të bashkëpunonte me të gjithë ata që janë për largimin e tyre.
Pjesë nga biseda në “Opinion”
Fevziu: A keni kontaktuar me zotin Berisha këto kohë që keni ngritur partinë?
Topalli: Po, para 4 ditësh.
Fevziu: Keni folur për këtë gjë?
Topalli: Absolutisht jo, nuk flas. Kjo është iniciativë e imja, që ka ardhur si rezultat i një reflektimi të gjatë.
Fevziu: E pakonsultuar me zotin Berisha?
Topalli: E pakonsultuar. Është një vendim që vjen pas një procesi, sigurisht vendimi nuk vjen në çast. Dhe unë besoj se vendi ynë ka nevojë për ndryshim dhe politika në mënyrë dëshpëruese ka nevojë të largojë tre kryetarët e korruptuar dhe për të gjet lider të pakorruptuar.
Vangjeli: Mendoni që duhet të qëndrojë i katërti?
Topalli: Të tre largohen duke ja ulur votat forcave të tyre politike dhe pastaj fillon procesi brenda forcave politike të tyre.
Ndërkohë e pyetur nëse do të bashkohej më parti të tjera të djathta për të hyrë në zgjedhje, Topalli nuk e përjashtoi mundësinë e koalicioneve. “Në parim jam për të bashkëpunuar me të gjithë ata që janë për largimin e tre kryetarëve të korruptuar”, u shpreh Topalli./Opinion.al
