FC Barcelona duhet të paguajë te babai i Neymar bonusin për rinovimin e kontratës së brazilianit, të paktën sipas kushteve të aneksit të kontratës së shtyrë dhe të përmirësuar. Por, duke marrë shkas nga situata e krijuar përreth futbollistit braizilian, që ka lënë dyshime të forta në lidhje me vazhdimësinë e karrierës së tij te klubi blaugrana, me PSG si një destinacion shumë i mundshëm, klubi katalanas ka marrë një vendim në lidhje me bonusin. Barça do të depozitojë shumën e 26 milionë euro, që është premio e përcaktuar në kushtet e kontratës së rinovuar, te një zyrë noteriale, për të pritur vendimin e futbollistit, nëse do të qëndrojë apo jo në Nou Camp.
Sikurse njofton “Mundo Deportivo”, nuk është se Barça nuk dëshiron të paguajë detyrimin e saj. Barça thjeshtë po pret për reagimin e Neymar. Nëse ai do të vendosë të përmbushë kushtet e kontratës, atëherë babai i Neymar do të paguhet. Nëse vendimi do të jetë ndërprerja e kontratës, atëherë Barcelona po studion një skenar të ri në aspektin ligjor. Sipas pretendimeve të klubit blaugrana, premio prej 26 milionë euro i është premtuar babait të Neymar për përmbushjen e një kontrate 5-vjeçare, nga të cilat Neymar deri tani ka realizuar vetëm 1 vit. Sipas skenarit të ri të klubit katalanas, nëse Neymar vendos të largohet, atëherë babai i tij duhet të paguhet vetëm për shumën proporcionale, për pjesën e ezauruar nga kontrata, pas rinovimit të tij. Në rast të divorcit dhe kundërshtimit nga ana e Neymar të shumës proporcionale, atëherë klubi do të publikojë argumentet e veta pa asnjë problem.
