Guardia di Finanza ka ekzekutuar pesë urdhëra-arresti të lëshuara nga Gjykata e Apelit Etnean dhe ka arrestuar 2 shqiptarët, Nazar Seiti dhe Maridian Sulaj, të njohur si pjesëtarë të grupit të “Habilajve” si dhe 3 shtetas italianë, Angela Busacca, Antonio Riela dhe Vicenzo Sapampinato.
Ata janë nën hetim si pjesë e një organizate kriminale që trafikon lëndë narkotike si dhe akuzohen për armëmbajte pa leje. Mediat italiane shkruajnë se kanabisi trafikohej nga Shqipëria ndërsa në shtetin italian grupi kriminal operonte kryesisht në zonën e Katanias, Raguzës dhe Sirakuzës.
Tonelata droge nga Shqipëria
Veprimtaritë hetimore të kryera nga njësitë e specializuara antidrogë, kanë çuar në sekuestrimin e rreth 3.5 ton marijuanë, parave si dhe armë të tipit kallashnikovë. Po ashtu mediat e vendit fqinj shkruajnë se nuk kanë qenë të pakta operacionet e kontrollit që kanë çuar në arrestimin e korrierëve dhe në kuadër të këtij procedimi në flagrancë janë arrestuar 24 persona. Është përfshirë edhe policia shqiptare dhe Interpoli, të cilët kanë arritur të konstatojnë lëvizjen e 4 tonëve lëndë narkotike të tjera nga grupi.
Per çfarë akuzohen të arrestuarit
Maridian Sulaj u dënua me 8 vite burg, pasi u shpall fajtor për trafik droge, me rrethanat rënduese për shkak të sasisë së madhe. Angelo Busacca u dënua me 6 vjet e 10 muaj burgim (nga të cilat 6 vjet, një muaj e 26 ditë për t’u shlyer), pasi u shpall fajtor për një komplot kriminal me qëllim trafikun e drogës.
Antonino Riela u dënua me 14 vjet e 8 muaj burgim (nga të cilat 13 vjet, 10 muaj e 14 ditë për shlyerje), për shkak se ishte fajtor për krimet e komplotit dhe trafikut të drogës, me rrethanat rënduese të sasisë së madhe, si dhe armëmbajtje pa lejë. Nezar Seiti u dënua me 6 vjet e 8 muaj burgim (të gjitha për t’u shlyer), pasi u shpall fajtor për veprën penale të komplotit për qëllime të trafikut të drogës;
Ndërsa, Vincenzo Spampinato u dënua me 9 vjet burgim (nga të cilat 8 vjet, 3 muaj e 8 ditë ende për shlyerje), për shkak se ishte fajtor për shoqërim kriminal dhe trafik droge, me rrethanat rënduese të sasisë së madhe si dhe armëmbajtje pa leje.
