Ish-deputetja e Partisë Demokratike ka denoncuar një projektligj të propozuar nga mazhoranca, ku parashikohet forma e “tjetërsimit” të pronës. Tabaku, e cila pak ditë më parë denoncoi edhe krijimin e Korporatës së Investimeve si një formë e pastër korruptive e qeverisë, thotë se kjo gjë bie ndesh me Kushtetutën e vendit.
“Ky term nuk ndodhet në kushtetutën e vendit ku përcaktohet shumë mirë se si FITOHET një pronë private; pra përmes dhurimit, trashëgimisë apo dhe blerjes. Kjo shpikje ekstra kushtetuese ka vetëm një synim, ligjërimin e dhurimit të pronës nga e përbashkëta tek oligarku”, shkruan Tabaku.
Ajo thotë se ky ligj bie në kundërshtim edhe me rregullat e Bashkimit Europian dhe MSA, duke premtuar anulimin e tij kur Partia Demokratike të vijë në pushtet.
“Ky është ndryshimi i pestë në radhë me një paketë ligjore antikushtetuese që nuk duket se është shkruar më zyrat e shtetit por të biznesit që do përfitojë. Së bashku me Korporatën e Investimeve ky është një ligj kuadër që bën të mundur të anashkalojnë Parlamentin e Këshillat Bashkiakë sa herë kanë nevojë të zaptojnë një pronë. Ky ndryshim e ngre në një nivel tjetër korrupsionin e ngritur në sistem. Arroganca ka arritur në atë nivel që nuk kanë më frikë nga asgjë, korrupsioni me ligje bëhet diten për diell e votohet nga parlamenti ilegjitim. Ky ligj do të anullohet bashkë me gjithë paketen aktikushtetuese kundër pronës!”, shkruan Jorida Tabaku./Opinion.al
