Në kuadrin kohor të 12 orëve në Shqipëri janë regjistruar 3 vrasje. Pas dy viktimave në Elbasan, mësohet se një 65-vjeçar është vrarë rreth orës 23:05, në Xhafzotaj të Shijakut.
Dy vëllezërit Fiqiri Çalliku 65 vjeç dhe Fadil Çalliku 63 vjeç janë qëlluar me thikë nga një person që ishte duke vjedhur misër në tokën e tyre.
Dy vëllezërit kishin shkuar të plagosur në spitalin e Durrësit, por 65-vjeçari nuk mundi t’u mbijetonte plagëve të marra, ndërsa Fadil Çalliku ndodhet në kujdesin e mjekëve.
Aktualisht, janë shoqëruar disa persona dhe janë sekuestruar prova materiale në vendngjarje. Vijon puna për zbardhjen e ngjarjes, identifikimin dhe kapjen e autorit.
Ndërkohë, Tatjana Skufi, e afërme e vellezërve Fiqiri e Fadil Çalliku tregon se ata kishin shkuar te toka për të kontrolluar misrin pasi ditë më parën e kishin vjedhur.
Por pasi ata ishin vonuar, djali i 65 vjeçarit Fiqiri Çalliku kishte shkuar për të kontrolluar ku kishte gjetur të plagosur me thikë babain dhe xhaxhain.
Ajo mohon që ata të kenë konflikte, duke treguar se janë një familje punëtore dhe e nderuar në Shijak.
“Viktimat vajtën të ruanin misrin se u kishin vjedhur para disa ditësh. U vonua babai dhe djali i gjeti të plagosur të dy dhe i futi në makinë. Janë njerëz të ndershëm, asnjë konflikt nuk kanë, punojnë si qen ditë dhe natë, familja më e mirë në Shijak, Çalliktë e Shijakut”,- tha Tatjana Skufi,/ Opinion.al
