Organizatat humanitare bëjnë me dije se kanë marrë të dhëna për një tjetër tragjedi me emigrantët në Oqeanin Atlantik, ku mendohet të jenë mbytur më shumë se 30 persona pranë ishujve Kanarie.
Sipas agjencive humanitare, “Walking Borders” and “Alarm Phone”, në varkën e mbytur udhëtonin mbi 60 persona, teksa deri në këto momente autoritetet spanjolle kanë shpëtuar 24 njerëz në det të hapur.
Të dhënat për mbytjen e varkës janë ende të paqarta, me organizatat që japin detaje se u lajmëruan për tragjedinë nga personat që udhëtonin në mjetin lundrues.
Ndërkohë që një debat ka nisur në Spanjë për këtë ngjarje, pasi një anije e ndihmës së shpejti ndodhej shumë pranë vendngjarjes, por nuk ndërhyri pasi operacioni ishte marrë përsipër nga autoritetet marokene.
Kreu i rajonit të Ishujve Kanarie, Angel Victor Torres e cilësoi ngjarjen një tragjedi dhe i kërkoi Bashkimit Europian të vendosë një politikë në lidhje me emigracion e paligjshëm që ofron përgjigje të koordinuar.
