Ministri i ri i Drejtësisë, Petrit Vasili ka shprehur kundërshti të fortë për rolin e operacionit ndërkombëtar të monitorimit të Vetingut (ONM).
Nëpërmjet një letre drejtuar Presidentit, Kryeparlamentarit, Kryeministrit dhe ambasadorëve, Vasili ka vënë në dyshim kushtetutshmërinë e bordit.
Një bord ky që, siç thekson ministri Vasili, nuk parashikohet në Kushtetutë dhe as nuk respekton përcaktimin kushtetues për të patur në përbërje vetëm gjyqtarë dhe prokurorë.
“Çdo parashikim tjetër për sa i përket Bordit të Menaxhimit të Operacionit Ndërkombëtar të Monitorimit, përbërjes, rolit të tij të paqartë në proces, anëtarësisë së tij me pjesëmarrës të të përhershëm dhe të përkohshëm, si dhe përfshirja brenda tij të përfaqësuesve të ambasadave respektive, nuk gjejnë mbështetje qoftë në Kushtetutë, qoftë në ligj”, shkruan ministri në letër.
I menjëhershëm është reagimi i kryetarit të Komisionit të Ligjeve, Fatmir Xhafaj, edhe në cilësinë e ish-kryetarit të Komisionit të Reformës në Drejtësi.
Ai thotë se e ka cilësuar të paligjshëm procesin e zgjedhjes së Këshillit të Emërimeve në Drejtësi. Pra sulmon shortin që u hodh në sytë e Ilir Metës.
Në letrën që u ka dërguar po të hënën, ministrit të Drejtësisë, Presidentit, Kryeparlamentarit dhe kryetarëve të Gjykatës Kushtetuese, Gjykatës së Lartë dhe Prokurorit të Përgjithshëm, Xhafaj thotë se procesi përzgjedhjes së listave nga Prokuroria e Përgjithshme dhe Këshilli i Lartë i Drejtësisë është në kundërshtim me Kushtetutën.
“Kjo do të thotë, që edhe rezultati i nxjerrë nga shorti është antikushtetues”, thotë kreu i Komisionit të Ligjeve, sipas të cilit në proces janë përdorur dy standarde.
Kësisoj, tani jemi para një tjetër debati të madh mes dy aleatëve të koalicionit lidhur me zbatimin e reformës në drejtësi, por jo me dalje publike si herët e kaluara por me shkresa….
