Një tjetër parking i madh nëntokësor hapet në Tiranë. Bashkia e Tiranës njoftoi se parkingu publik me 328 vende ndodhet tek Bulevardi i Ri.
“Sot hapim një pjesë të dytë të projektit të bulevardit, i cili është parkingu i dytë nëntokësor në Tiranë, pas atij te sheshi “Skënderbej”. Dy vite më parë as imagjinohej që Tirana të kishte disa parkingje nëntokësore. Sot hapim të dytin, ndërkohë që brenda vitit do të fillojmë parkingun te stadiumi “Qemal Stafa”, te sheshi “Italia”, për të zgjidhur edhe aty problemin e parkingut”, tha Veliaj.
Sipas tij, parkingu i ri nëntokësor do të zgjidhë të gjithë ngërçin e zonës së ish-Stacionit të Trenit. “Këtu ka shumë institucione shtetërore, është pranë hipotekave, pranë burgut, pranë disa gjykatave, është pranë një pjesë të institucioneve universitare, pranë maternitetit, pra ka shumë institucione të cilat kanë nevojë për parkim.
Parkimi këtu është shumë afër, madje për ata që parkojnë me orë të zgjatura u bie më lirë të parkojnë nëntokë sesa në rrugë, ku edhe makina është gjithë ditën në diell apo edhe elementet e sigurisë janë më të pakta”, u shpreh më tek Veliaj.
