Pas tragjedisë së vrasjes së fëmijëve nga babai, një tjetër ngjarje e rëndë raportohet në Korçë. Një 28-vjeçar ka tentuar të vrasë babanë e tij, i cili ndodhej i shtruar në spital.
Sipas policisë së Korçës, i riu Petrika Ceco kishte hyrë në ambientet e spitalit të Korçës rreth orës 19:30 të ditës së djeshme, dhe pasi ka ushtruar dhunë fizike mbi babain e tij, ka tentuar ta mbytë me një rrip sintetik.
M.C, 61 vjeç ishte i shtruar në pavijonin e Patologjisë, për të marrë ndihmë mjekësore, tha policia.
Autori i tentativës së vrasjes, Petrika Ceco, është larguar nga vendngjarja por policia e ka gjetur të fshehur në banesën e gjyshërve në lagjen nr 1. Ai është arrestuar dhe akuzohet për “tentativë vrasjeje për shkak të marrëdhënieve familjare”.
Babai i tij, shtetasi M.C, ndodhet nën kujdesin e mjekëve, jashtë rrezikut për jetën. Dyshohet se motivi i kësaj ngjarje, mund të ketë qenë një konflikt familjar.
Materialet hetimore i kaluan për ndjekje, Prokurorisë pranë Gjykatës për Krimet e Rënda në Tiranë.
