Qeveria ka miratuar një tjetër masë kufizuese në kuadër të planit të masave për kufizimin e përhapjes së infeksionit të shkaktuar nga Covid-19, i cili po bën kërdinë në veri të Italisë, ndërsa ka alarmuar botën.
Kryeministri, Rama ka kufizuar orarin e punës së administratës publike deri në orën 13:00 të drekës, nga ora 16:00 që ishte deri më tani.
Vendimi i publikuar mbrëmë në Fletoren Zyrtare ndryshon vendimin nr. 511, datë 24.10.2002, të Këshillit të Ministrave, për kohëzgjatjen e punës dhe të pushimit në institucionet shtetërore, të ndryshuar.
Gjithashtu në vendim thuhet se nëpunësit civilë dhe punonjësit e përmendur në këtë pikë, gjatë kësaj periudhe, ngarkohen të kryejnë çdo detyrë funksionale që iu ngarkohet nga eprori i drejtpërdrejtë apo titullari i institucionit, e cila mund të përmbushet në kushtet e banesës, nëpërmjet komunikimit telefonik apo të mënyrave të tjera të komunikimit elektronik.
Këto masa kufizuese nuk do të prekin pagën e administratës publike dhe deri më tani, kryeministri ka vendosur të përgjysmojë vetëm pagën e ministrave dhe deputetëve./Opinion.al
