Një 54-vjeçare invalide ka kërkuar urdhër mbrojtjeje në Gjykatën e Tiranës, për shkak të dhunës fizike dhe psikologjike të djalit të saj. Nga episodet më ekstreme ka qenë ai i ditëve të fundit të dhjetorit 2015. Nëna është dhunuar gjithë natën nga biri i saj, për shkak se nuk i jepte 500 euro që ai të lante disa borxhe.
Sipas pretendimeve të paditëses R.Ç., djali i saj 20- vjeçar luante bixhoz dhe për këtë i kërkonte lekë në mënyrë të vazhdueshme. Pamundësia për t’i plotësuar këtë kërkesë nga 54- vjeçarja, që mbahej me pension invaliditeti, bëhej shkak për agresivitet të vazhdueshëm të të riut. Pak ditë më parë, Gjykata e Tiranës ka pranuar kërkesën e R.Ç., duke urdhëruar djalin e saj F.H. të mos kërcënojë dhe të mos kryejë asnjë veprim dhune të drejtpërdrejtë apo të tërthortë ndaj nënës së tij.
Po ashtu, gjykata urdhëronte të riun të mos i afrohej 54-vjeçares më afër se 200 metra, si dhe urdhëronte Policinë e Tiranës të shoqëronte 20- vjeçarin të merrte sendet personale dhe të largohej nga banesa. Gjatë shqyrtimit të kërkesës në gjykatë, paditësja ka deklaruar se problemi mes saj dhe djalit është fakti që ai luan bixhoz dhe për këtë ai i kërkon para.
Ajo ka rrëfyer se kur nuk ka mundësi ta ndihmojë, ai e dhunon psikologjikisht duke e fyer në mënyrë të vazhdueshme, si edhe fizikisht duke e goditur. Paditësja ka pohuar se ka frikë të qëndrojë në banesë për shkak të veprimeve të dhunshme të të birit. Një nga incidentet e fundit ka qenë ai i ditëve të fundit të dhjetorit 2015. Edhe pse është përpjekur të qetësojë të birin, ai e ka goditur me grushte në kokë, duke i kërkuar 500 euro për të larë disa borxhe. Sipas saj, situata ka vazhduar deri në orët e para të mëngjesit. Në mëngjes, duke mos gjetur zgjidhje, 54-vjeçarja ka denoncuar në polici dhunën e djalit të saj. “Paditësja deklaron se këtë sjellje e ka që në moshën 13 vjeç.
Ajo ka bërë përpjekjet e saj për të rregulluar këtë situatë, por për shkak të vesit që ka i padituri, që luan bixhoz dhe futet në borxhe, ka filluar të përdorë dhunë ndaj nënës së tij”, thuhej në vendimin e Gjykatës. Për shkak të kësaj situate, R.Ç. është larguar nga banesa nga frika se mos dhunohet nga biri i saj. Ajo ka deklaruar se sa herë që shkon për të marrë ndonjë objekt në banesë është e detyruar të shkojë e shoqëruar për shkak se frikësohet nga reagimi që mund të ketë i biri./Panorama
