Zbardhen 6 vjedhje dhe tentativa për vjedhje të kryera gjatë këtij muaji, vihet në pranga T. H., 30 vjeç, banues në Skrapar.
Sipas Policisë së Tiranës, nga hetimet rezulton se ky shtetas ka vjedhur 3 celularë dhe një shumë parash në 2 dyqane, 1 monopatinë, një market, si dhe ka tentuar të vjedhë në 2 subjekte të tjera.
Blutë e kryeqytetit po punojnë për të zbardhur vjedhje të tjera që mund të ketë kryer 30-vjeçari, ndërkohë materialet procedurale iu referuan Prokurorisë së Tiranës, për veprime të mëtejshme.
Njoftimi i Policisë
Tiranë/Vijojnë operacionet policore për zbardhjen e vjedhjeve dhe nxjerrjen e autorëve të tyre, përpara përgjegjësisë penale. Finalizohet nga Komisariati i Policisë Nr. 2, operacioni policor i koduar “April”. Zbardhen 6 vjedhje/tentativa për vjedhje, të kryera gjatë këtij muaji.
Identifikohet dhe kapet autori i tyre, me precedent të theksuar për këtë krim. Këtij shtetasi i gjendet dhe i sekuestrohet 1 celular, i dyshuar i vjedhur.
Si rezultat i hetimeve të kryera me qëllim zbardhjen e vjedhjeve të denoncuara nga qytetarë ose administratorë subjektesh, gjatë këtij muaji, shërbimet e Komisariatit të Policisë Nr. 2 finalizuan operacionin policor të koduar “April”. Gjatë operacionit u vu në pranga shtetasi T. H., 30 vjeç, banues në Skrapar.
Nga hetimet dyshohet se ky shtetas ka vjedhur 3 celularë dhe një shumë parash në 2 dyqane, 1 monopatinë, një market, si dhe ka tentuar të vjedhë në 2 subjekte të tjera. Punohet për të zbardhur vjedhje të tjera që mund të ketë kryer 30-vjeçari. Materialet procedurale iu referuan Prokurorisë së Tiranës, për veprime të mëtejshme.
