Të shtëna me armë zjarri janë regjistruar ditën e sotme në Tiranë. Mësohet se nga të shtënat në zonën e Xhamllikut kanë mbetur të plagosur dy persona.
Kreu i policisë së Tiranës, Rebani Jaupi u shpreh se një polic ka ndaluar në rrugë një qytetar, të cilit i ka kërkuar motivin pse ndodhet në lëvizje dhe një mjet identifikimi.
Ky i fundit nuk ka pranuar të identifikohet, dhe ka kërcënuar policin se do ta qëllojë. Sipas informacioneve, personi i plagosur është Orges Bilbili, i cili ka rrezikshmëri të lartë shoqërore, por emri i tij do publikohet më vonë. Në këto kushte polici ka qëlluar në ajër për ta paralajmëruar dhe më pas e ka qëlluar atë në këmbë.
Po ashtu, aksidentalisht është plagosur dhe një kalimtare. Të dy të plagosurit ndodhen tek Trauma dhe janë të plagosur në këmbë.
“Polici ka ndaluar personin dhe i ka kërkuar mjet identifikimi. I ka kërkuar se çfarë keni në çantë. Qytetari është larguar me vrap.. Punonjësi i policisë e ka ndjekur nga prapa dhe në kthesën e parë i ka drejtuar armën. Punonjësi i policisë e ka paralajmëruar të ulë armën dhe ka qëlluar një herë në ajër. Qytetari ka lëvizur me vrap dhe në kohën që polici e paralajmëroi që të ulë armën e të dorëzohet ai i ka drejtuar armën dhe i ka thënë do të të qëlloj nëse nuk largohesh. Policia ka qëlluar në drejtim të tij, dhe e ka plagosur. Aktualisht ndodhet në spital, dhe mendohet se është plagosur në këmbë, por akoma nuk kemi të dhëna të sakta. Rastësisht ka qenë një qytetare e cila është plagosur nga plumbi i policit. Nuk e kemi identifikuar akoma këtë qytetar por dyshimet e para bien që kemi të bëjmë me një person shumë të rrezikshëm i shpallur në kërkim por do e bëjmë publik sapo të marrim gjurmët e të saktësojmë identitetin e tij”,-tha Jaupi ./ Opinion.al
