Policia e Tiranës ka identifikuar autorin që një ditë më parë dhunoi brutalisht 42-vjeçarin Rigels Kaso, banues në Bilisht.
Mësohet se në kërkim është shpallur 34-vjeçari nga Peshkopia, Bajram Gjeleshi, i cili e ka dhunuar me sende të forta për motive të dobëta.
Ngjarja ndodhi mëngjesin e djeshëm në rrugën “Sokrat Miho”, në Tiranë.
42-vjeçari Kaso ndodhet në gjendje të rëndë shëndetësore, madje raportohet se ai ka pësuar vdekje klinike.
“Në vijim të njoftimit paraprak të dhënë ditën e djeshme, më datë 15.07.2024, specialistët e Sektorit për Hetimin e Krimeve ndaj Personit kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, dhe po punojnë për kapjen e shtetasit B. Gj., 34 vjeç, lindur në Peshkopi dhe banues në Tiranë.
Shtetasi B. Gj., ditën e djeshme, më datë 15.07.2024, në rrugën “Sokrat Miho”, dyshohet se për motive të dobëta, ka goditur me sende të forta shtetasin R. K., 42 vjeç, banues në Bilisht, i cili ndodhet në spital, nën kujdesin e mjekëve.
Materialet i kaluan Prokurorisë për veprën penale “Plagosja e rëndë me dashje”, parashikuar nga neni 88 i Kodit Penal”, njofton policia.
