Gjashtë persona të akuzuar për vepra të ndryshme penale janë vënë në pranga nga Policia e Tiranës.
Autoritetet bëjnë me dije se është arrestuar në flagrancë shtetasi I. M., 34 vjeç, banues në Vorë, pasi gjatë kontrollit të ushtruar në automjetin dhe në banesën e tij, efektivët e policisë gjetën një sasi me lëndë narkotike kanabis, një sasi me lëndë narkotike resinë (nënprodukt i kanabisit), një peshore elektronike, një shumë parash dhe një aparat celular, të cilat u sekuestruan në cilësinë e provës materiale, së bashku me automjetin.
Po ashtu, uniformat blu bënë ndalimin e shtetasit të shpallur në kërkim A. S., 31 vjeç, pasi Prokuroria e Rrethit Gjyqësor Tiranë ka dërguar urdhrin e datës 16.03.2021, për ndalim, për veprën penale “Goditja për shkak të detyrës”.
Ndërsa nga specialistët për Hetimin e Krimit në Komisariatin e Policisë Nr. 6 u bë ekzekutimi i urdhrit të ndalimit për shtetasin në kërkim K. M., 24 vjeç, pasi Gjykata e Shkalles së Parë Tiranë e ka dënuar me 2 muaj burg, për veprën penale “Plagosja e lehte me dashje” kryer në bashkëpunim. Po nga specialistët për Hetimin e Krimit në Komisariatin e Policisë Nr. 6 u bë arrestimi në flagrancë i shtetasit F. H., 41 vjeç, pasi ka goditur me grusht, për shkak të detyrës, administratorin e pallatit.
Policia bën me dije se janë vënë në pranga P. J., 41 vjeç, pasi u kap duke drejtuar mjetin në gjendje të dehur në masën 0.78 mg/l dhe E. D., 27 vjeç, pasi u kap duke drejtuar mjetin pa lejen përkatëse.
Materialet iu referuan Prokurorisë së Rrethit Gjyqësor Tiranë, për veprime të mëtejshme./Opinion.al
