Kushdo që lëviz në Tiranë me mjete private apo të transportit urban ka vënë re një trafik të shtuar gjatë ditës së sotme. Shkak është bërë bllokimi i Sheshit Skenderbej për kalimin e makinave. Bashkia e Tiranës në një komunikatë për mediat, tha se sheshi do të jetë i aksesueshëm vetëm për këmbësorët. Dhe kjo nuk zgjat një ditë apo dy por plot 12 muaj.
Çfarë do të bëhet në Sheshin Skenderbej?
Përmes komunikatës së bashkisë mësohet se punimet ndahen në dy faza. Në fazën e parë që ka nisur sot, përfshihen punimet për kompletimin e sistemit të kanalizimit të ujrave të shiut, si dhe atë të shatërvaneve, dhe më pas do të vazhdohet me nënshtresat dhe shtresën përfundimtare të gurëve nga gjitha trevat shqiptare. Punimet e kësaj faze do të zgjasin 12 muaj.
“Punimet fillojnë nga zona e Muzeut Kombëtar ku do të bëhet rikonstruksioni total i xhokolit të ndërtesës, rikonstruksioni i shkallëve hyrëse në Muzeun Kombëtar, si dhe do të punohet në lulishtet përreth Muzeut, të cilat do të shndërrohen në kopësht botanik. Gjithashtu, do të punohet edhe për realizimin e sistemit të ndriçimit të jashtëm të Muzeut Kombëtar dhe kopshteve përreth tij. Puna do të vijojë me rikonstruksionin e shkallëve të Pallatit të Kulturës dhe platformave hyrëse të Teatrit të Operas dhe Bibliotekës Kombëtare”, njofton Bashkia.
Faza e dytë është ajo e punimeve të projektit të parkimit nëntokësor, që do të fillojë në fund të muajit tetor, projekt i cili do të realizohet në një afat 7 mujor.
Deri tani, nuk është zhvilluar asnjë dëgjesë publike, apo shpjegim i detajuar i projektit për rikonstruksionin e Sheshit Skenderbej në kryeqytet. Nuk dihet as fondi i akorduar dhe kush po i bën punimet? /Opinion.al
*Në skicë, devijimi i trafikut në sheshin Skenderbej
