Prezantimi i futbollistit të Kombëtares shqiptare, Elseid Hysaj para shokëve të skuadrës së Lazios me këngën “Bella Ciao”, është kthyer në një konfrontim me tifozët e skuadrës për ideologji politike.
Hysaj zgjodhi të këndojë këngën e njohur italiane që është kthyer sërish në vëmendje pasi u bë pjesë e serialit “Casa de Papel”.
Tifozët e Lacios, me sa duket në një numër të konsiderueshëm mbështetës të ekstremit të djathtë, nuk kanë pëlqyer këtë veprim të lojtarit të kombëtares shqiptare, duke e kritikuar e madje kanë arritur deri në kërcënime.
Lidhur me këtë situatë vetë klubi i Lacios ka reaguar në një komunikatë zyrtare.
“Është detyra e klubit që të mbrojë një pjesëtar të tij dhe ta largojë nga instrumentalizimet personale dhe politike që qartësisht në këtë çështje nuk kanë të bëjnë aspak me kontekstin informal dhe miqësor në të cilin u zhvillua episodi. Grumbullimi i skuadrës duhet të vazhdojë në përkushtimin maksimal sportiv dhe në klimën e qetësisë që është shfaqur deri më sot”, shkruhej në këtë komunikatë të Lacios.
Por situata nuk është ndalur me kaq, kanë qenë disa prej tifozëve të Lacios, të cilët kanë shkuar tek vendi ku po darkonte skuadra. Për të shmangur një konfrontim fizik të pranishëm kanë qenë edhe forca speciale policore, gjithmonë në ruajtje të ekipit kryeqytetas.
Në atë moment është gjendur aty pranë edhe drejtori sportiv Igli Tare si dhe mbrojtësi i Kombëtares Hysaj.
Ndërkohë trajneri Mauricio Sarri pritet të reagojë në mbrojtje të futbollistëve të tij.
