Ministri i Brendshëm, Bledi Çuçi deklaroi sot para Kryeministrisë se qeveria mori vendim për dhënien e shtetësisë shqiptare shtetasve të huaj që kanë kontribute të veçanta në fushën e arsimit, shkencës dhe sportit.
Ministri bëri të ditur se ky vendim do të bëjë të mundur tërheqjen e rekordmenëve të rinj.
“Qeveria mori vendim për dhënien e shtetësisë shqiptare për shtetasit e huaj që kanë kontribute të spikatura në fushën e arsimit, shkencës dhe sportit. Ky vendim plotëson një nen në ligjin e ri për shtetësinë, që e hap këtë të drejtë dhe përcakton procedurat dhe afatet për dhënien sa më shpejt të shtetësisë shqiptare për këta persona me kontribute. Me këtë vendim bëjmë të mundur që ta kthejmë dhe si një instrument për të thithur rekordmenët e rinj”,-tha Çuçi.
