Kreu i Partisë Demokratike, Lulzim Basha, të mërkurën, mohoi në Syri.net me gazetarin Çim Peka skenarin e këtyre ditëve që qarkulloi në media se përfaqësues të opozitës kanë bërë thirrje për qytetarët që të armatosen në rast të një mosveprimi nga qeveria.
Kurse për sa i përket raportit të opozitës me Parlamentin, Basha tha se do të jetë një marrëdhënie që pamundëson fasadizimin e një parlamenti, të një qeverie të marrë peng nga krimi.
Sipas tij, kjo do të thotë, se as ligje nuk mund të bëhen, as normalitet nuk mund të ketë; sa kohë që në Parlament dhe në qeveri ulen njerëz tashmë të faktuar si njerëz të lidhur me krimin nga Fatmir Xhafaj tek Taulant Balla dhe te Jurgis Çyrbja me shokë.
Në takimin e pardjeshëm në Shkodër a ka patur zëra nga përfaqësues të ndryshëm të opozitës se në rast mosveprimi nga qeveria, t’u bëhet thirrje qytetarëve për vetë armatosje?
Jo!
A e shikoni si opsion?
Sigurisht që jo! Sepse kjo në vetvete do t’i jepte fund politikës. Duhet të kuptojë diçka, ne ekzistojmë si parti politike, Partia Demokratike ekziston për t’i dhënë qytetarëve një zgjidhje politike, për të dhënë një alternativë, një shpresë, për t’i dhënë mundësinë që të kalojmë një bashkëqeverisje me krimin te një qeveri e cila në vend që të bëjë pakt me krimin e shtypë.
Si do të mundni krimin në politikë z.Basha?
Ne nuk kemi punë me krimin në politikë se ne nuk kemi as polici, as xhandarmëri tonën, por ne kemi punë me qeverinë që është gjysma e bandës. Ne me bandat luftë nuk bëjmë dot, por me qeverinë që mbështet bandat po, luftë politike deri në rrëzimin e saj dhe zëvendësimin e saj me një qeveri e cila ka vullnetin, planin dhe vendosmërinë për të rivendosur rendin publik, për të çliruar Shqipërinë nga zgjedha e krimit të organizuar dhe për t’i dhënë Shqipërisë një cikël normal sigurie, rendi dhe zhvillimi ekonomik. Jo luftë me bandat, por luftë me qeverinë që mbështet bandat. Sepse siç e thash partia politike nuk është detashmen ushtarak, nuk është polici alternative, nuk ka forcë paramilitare. Por luftë politike me qeverinë për ta zëvendësuar bashkëqeverisjen me krimin me një qeveri që e lufton, që ndëshkon dhe nuk e mbron e bashkëpunon me krimin.
