Thirrjet e Presidentit Erdogan dhe Putin për armëpushim në Libi duket se janë dëgjuar nga palët të cilat kanë rënë dakord të ulin armët duke nisur nga 12 janari.
Forcat e qeverisë së kryeministrit Fayez al-Sarraj dhe ato të gjeneralit Khalifa Haftar kanë arritur një marrëveshje për të shpallur armëpushimin në mënyrë që t’i hapin rrugën ndërmjetësimit për zgjidhjen e konfliktit që vijon prej muajsh.
Në një adresim të tyre, thuhet se “si përgjigje ndaj presidentit turk dhe presidentit rus për armëpushim, kryesuesi i Këshillit Presidencial shpall armëpushim”.
Ushtria Kombëtare e Libisë tha se armëpushimi do të fillojë nga 12 janari.
Misioni i Kombeve të Bashkuara në Libi ka mirëpritur armëpushimin dhe ka bërë thirrje ndaj të gjitha palëve për të bërë përpjekje për dialog.
“Çdo shkelje do të ketë pasoja të rënda”, tha zëdhënësi i ushtrisë, Ahmed Mismari.
Prej muajsh, forcat rebele të gjeneralit Haftar, të mbështetura nga Rusia, kanë lëshuar një ofensivë të ashpër që synon marrjen e kryeqytetit Tripoli e cila është qendra e qeverisë së al-Fayez i cili mbështetet nga Turqia dhe Kombet e Bashkuara. /Opinion.al
