Gazetari Armand Shkullaku me anë të një shkrimi në të përditshmen Mapo e ka cilësuar situatën e krijuar në opinionin publik pas propozimit të Sali Berishës në sallën e Kuvendit që shqiptarët të armatosen për të ruajtur veten dhe pronat e tyre, thjesht një hipokrizi e Edi Ramës.
Shkullaku shkruan se propozimi i Sali Berishës për të armatosur qytetarët shqiptarë, vazhdon ende të mbledhë nën armë Partinë Socialiste, qeverinë, aksesorët e tyre mediatikë dhe propagandistikë, për të ngritur një furtunë të vërtetë në gotën që vetë Berisha ua serviri.
“Po kërkohet hetimi, dënimi, përjashtimi, kallëzimi, demaskimi, shpartallimi i ish-kryeministrit si luftënxitës, që po bën thirrje antikushtetuese. Po cilësohet fashist e hitlerian dhe po i kërkohet prokurorisë të veprojë”, shkruan ai.
Ndërsa, nënvizoi se në këtë ortek që shpërtheu nga vetë krisma e Berishës, nuk mungojnë as ata që i bëjnë thirrje edhe PD-së të distancohet nga ish-lideri i saj.
Sipas Shkullakut, ata do të ishin në të drejtën e tyre jo vetëm ta denonconin propozimin e Berishës, por edhe të kërkonin një qëndrim moral e politik të pjesës tjetër të PD-së, nëse vërtetë do ta mendonin atë si skandal.
“Por si PS-së, ashtu dhe mediave të saj, nuk u intereson në thelb thirrja e Berishës-shkruan ai- por zhurma e ngritur prej saj”.
Ai shkruan se apeli për distancim dhe dënim është hipokrizi e pastër politike dhe jo një qëndrim që provokohet në emër të interesit apo shqetësimit qytetar. Mjafton për këtë të shihet se si ky qëndrim i zjarrtë vjen duke u tredhur kur i afrohet LSI-së.
“Ilir Meta, lideri tjetër i mazhorancës dhe kreu i Kuvendit, nuk mori pjesë në mbledhjen e Byrosë që vendosi përjashtimin e Sali Berishës. LSI deri më sot nuk ka thënë asnjë fjalë për “skandalin e armatosjes” dhe ka treguar hapur se nuk ka të njëjtin hall si PS dhe pjesa tjetër e qeverisë, për ta përjetuar ngjarjen në fjalë si një tragjedi kombëtare. Indiferenca e LSI kontraston fort me alarmin e Edi Ramës dhe aksesorëve të tij, duke nxjerrë zbuluar armatosjen e tyre për të çarmatosur Sali Berishën”, shkruan në Mapo Shkullaku.
