Një 43 vjeçar është arrestuar nga policia pasi ka kërcënuar me jete mjekun e spitalit të Gramshit duke i vendosur thikën në fyt. Policia tha se autori është Bujar Hoda, banues në fshatin Vinë, Njësia Administrative Pishaj,Gramsh. Mësohet se ai vuante nga çrregullime mendore por nuk është i pajisur me kartelë. Dje, 43 vjeçari ka shkuar në spital dhe ka akuzuar mjekun që nuk i ka mjekuar mirë bashkëshorten prej 15 vitesh.
“Arrestimi i tij u bë pasi, ky shtetas për motive të dobëta ka kanosur me mjet prerës thikë në oborrin e spitalit të Gramshit, mjekun H.K, 58 vjeç, banues në Tiranë. Pas marrjes së njoftimit shërbimet e Policisë kanë shkuar menjëherë në vendngjarje, ku kanë bërë kapjen dhe arrestimin e autorit. Në cilësinë e provës materiale u sekuestrua arma e ftohtë (thikë) me të cilën autori kanosi mjekun. Materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Kanosja për shkak të detyrës” dhe “Prodhimi,mbajtja, blerja apo shitja pa leje e armëve të ftohta”, parashikuar nga neni 238 dhe 279 të Kodit Penal”, thuhet në njoftimin e policisë.
