Një 19-vjeçar është vënë në pranga nga Policia pasi theu masën e sigurisë “Arrest në shtëpi”, duke dalë nga banesa dhe duke qëlluar në ajër me armë zjarri kallashnikov.
Po ashtu është proceduar penalisht një 15-vjeçar, i cili drejtonte makinën, në të cilën ndodhej edhe 19-vjeçari.
Uniformat blu bëjnë me dije se bëhet fjalë për shtetasin L.M. 19 vjeç i cili ka qenë udhëtuar me një automjet që drejtohej nga 15-vjeçari, në një moment kur kanë ndaluar, 19-vjeçari ka dalë nga automjeti dhe ka qëlluar në ajër me armë zjarri kallashnikov.
Policia ka sekuestruar një armë zjarri kallashnikov dhe 4 krehra.
“Shërbimet e Komisariatit të Policisë Nr. 7 në vijim të punës për evidentimin dhe goditjen e çdo rasti paligjmërie dhe vënien e autorëve përpara përgjegjësisë ligjore, pas informacionit të marrë se në afërsi të liqenit të fshatit Muçaj, një shtetas kishte qëlluar me armë zjarri në ajër, menjëherë kanë organizuar punën për kapjen e autorit të dyshuar dhe kanë finalizuar operacionin policor të koduar “Lake”.
Si rezultat i këtij operacioni u bë arrestimi i shtetasit L. M., 19 vjeç, banues në fshatin Muçaj, Vorë. Gjithashtu u procedua penalisht një shtetas i mitur 15 vjeç.
Shtetasi L. M., duke udhëtuar me një automjet që drejtohej nga 15-vjeçari, kanë shkuar te liqeni i fshatit Muçaj, dhe pasi kanë ndaluar, shtetasi L. M. ka dalë nga automjeti dhe ka qëlluar në ajër me armë zjarri kallashnikov.
Pas verifikimeve të kryera ka rezultuar se 19-vjeçari i arrestuar, kishte shkelur masën e sigurisë “Arrest në shtëpi”.
Në cilësinë e provës materiale u sekuestrua arma e zjarrit kallashnikov e përdorur gjatë ngjarjes dhe 4 krehra”, tha policia.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale./Opinion.al
