Shatërvani i Trevit, rreth 300-vjeçar, vizitohet nga miliona turistë çdo vit. Tradita e hedhjes së një monedhe në të është bërë e famshme nga kënga e Franc Sinatrës “Tre monedha në shatërvan”, në një komedi romantike të vitit 1954 me të njëjtin titull. Sipas legjendës, kush mbyll sytë i kthyer me kurriz nga shatërvani dhe hedh një monedhë, rikthehet në “Qytetin e Përjetshëm” ose gjen dashurinë e jetës. Ndaj, çdo vit, shatërvani i Trevit, një ndër monumentet më të shquar të kryeqytetit italian (edhe falë skenës së ‘zhytjes së Anita Ekberg në filmin “La dolce vita”), mbushet plot me monedha.
Së fundmi ai është bërë objekt mosmarrëveshjes mes kryebashkiakes së Romës dhe Kishës Katolike.
Çdo vit, rreth 1.5 milionë euro nxirren nga shatërvani i Trevit. Sipas traditës, ato jepen për të ndihmuar njerëzit në nevojë. Por tani Virginia Raggi, kryebashkiakja kërkon që paratë të shpenzohen për infrastrukturën e dëmtuar të qytetit.
Organizata humanitare “Karitas” thotë se, humbja e këtyre të ardhurave do të rëndojë mbi të varfrit.
“Ne nuk e kishim parashikuar këtë rezultat”, thotë drejtori i “Karitasit”, At Benoni Ambarus. “Unë vazhdoj të shpresoj se ky nuk është një vendim përfundimtar”.
Mediet italiane e kanë pasqyruar gjerësisht konfliktin, nën tituj si “Paratë u merren të varfërve” etj..
Gjithsesi këshilltarët e qytetit e kanë miratuar ndryshimin, që pritet të hyjë në fuqi në prill. Sidoqoftë, shumë italianë u janë drejtuar mediave sociale për t’iu kërkuar këshilltarëve të rishikojnë vendimin.
