Kreu i grupit parlamentar i Partisë Demokratike, Gazment Bardhi ka kërkuar që ministri i Brendshëm, Ervin Hoxha, të paraqitet në Kuvend.
Sipas tij, Bardhi tha se Hoxha duhet të japë llogari për mosveprimin e policisë gjatë protestës para SPAK në mbështetje të Erion Veliajt.
Për këtë arsye Bardhi tha se ministri i brendshëm duhet të dorëhiqet dhe shkarkohet nga detyra.
“Thërrisni në seancë ministrin e Brendshëm, që në seancën e kaluar gënjeu pa turp, duke na dhënë informacione të rreme që Policia nuk kishte pasur asnjë dijeni për prezencën e një turme para SPAK kur po mbahet seanca për masën ndaj Veliajt.
SPAK dhe GJKKO kanë konfirmuar se kishin njoftuar për cenimin e ambienteve të sigurisë dhe në mënyrë të paprecedentë Policia e Shtetit, jo vetëm nuk kishte bërë detyrën, por ka refuzuar thirrjen e Gardës së Republikës. Nuk mund ta lëmë pa e kaluar këtë. Kjo do të thotë që kanë rënë themelet e shtetit. Jo vetëm duhet të dorëhiqet, po Ministri i Brendshëm duhet të shkarkohet.
Madje, qëndrimi i Policisë së Tiranës ishte akoma më idiot, kur thoshte se nuk tubimi ishte spontan. Kur tubi është spontan, quhet i paligjshëm.
Qëllimi ishte një, që Edi Rama me punonjësit e administratës i kërcënon jetën çdo prokurori dhe gjyqtari që jep vendime pa e pyetur.
Zonja kryetare, thërrisni në seancë ministrin të japë llogari”, tha Bardhi.
