Teksa përplasjet mes Iranit dhe Izraeli sa vijnë e bëhen më të ashpra, lideri suprem iranian, Ajatollah Ali Khamenei, po merr masa emergjente për të siguruar vazhdimësinë e regjimit që drejton që prej revolucionit islamik të 1979-ës.
Sipas burimeve nga Teherani të raportuara nga New York Times, Khamenei, i fshehur aktualisht në një bunker për shkak të frikës nga atentatet, ka krijuar një zinxhir komandues ushtarak, me zëvendësues të përcaktuar, në rast të eliminmeve të drejtuesve aktual ushtarakë nga Izraeli.
Khamenei ka emëruar gjithashtu edhe tre figura të larta të klerit si kandidatë potencialë për pasardhës, duke shfaqur shqetësimin e tij për sigurinë personale.
Sulmet izraelite, të cilat në vetëm tetë ditë kanë eliminuar mbi 25 drejtues politikë dhe ushtarakë kyçë të Iranit, kanë shtuar ndjeshëm shqetësimet e Khameneit.
Sipas ekspertit të çështjeve iraniane, Vali Nasr, “prioriteti absolut i Khameneit është ruajtja e shtetit dhe vazhdimësia e regjimit”. Ai përshkruan vendimet e udhëheqësit suprem si të “kalkuluara dhe pragmatike”.
Po ashtu vlen të theksohet se djali i Khameneit, Mojtaba, i konsideruar më parë si një kandidat i mundshëm për pasardhës, nuk është përfshirë në këtë listë.
