Presidenti i Kosovës Hashim Thaci ka thënë se ka refuzuar të marrë pjesë në Samitin rajonal të Ohrit pasi disa nga vendet pjesëmarrëse nuk e njohin pavarësinë e Kosovës.
Thaçi shkruan se Kosova është anashkaluar nga Serbia në këtë samitin e parë të kësaj iniciative të re rajonale dhe se nuk ka kuptim sipas tij që të marrë pjesë në një samit ku janë dy vende të rajonit që nuk e njohin shtetin e pavarur të Kosovës.
Por ai shton gjithashtu në arsyet e vendimit të tij për mospjesëmarrje se vizioni i Kosovës mbetet anëtarësimi në BE dhe nuk dëshiron “asnjë rrethanë ta zëvendësojmë perspektivën tonë euroatlantike me çfarëdo iniciative rajonale”.
Iniciativa e fundit rajonale është “mini-shengeni ballkanik” e cila është mbështetur fort nga kryeministri Rama dhe presidenti serb Aleksandër Vuçiç. Por mesa duket kreu i shtetit të Kosovës nuk e sheh me sy të mirë këtë iniciativë.
“Ne jemi të përkushtuar që të tejkalojmë pengesat aktuale nëpërmjet dialogut dhe marrëveshjes për njohje reciproke. Vetëm atëherë kur të ndodhë një gjë e tillë, ne do të bëhemi pjesë e iniciativave të tilla rajonale si shtete të barabarta” mbyll Thaçi reagimin e tij.
Nesër zhvillohet Samiti për Zbatimin e katër lirive të Bashkimit Europian, ku përfshihen lëvizja e mallrave, njerëzve, produkteve dhe shërbimeve. Kryeministri Rama mbërriti sot në Ohër ku do të marrë pjesë në një darkë që ka shtruar presidenti Pendarovksi me liderët pjesëmarrës në samit. Përveç Kosovës, në Samit nuk do të jenë të pranishëm edhe përfaqësues të Malit të Zi /Opinion.al
