Vendimi i qeverisë së drejtuar nga Albin Kurti për të kufizuar lëvizjen e qytetarëve në Kosovë si pjesë e paketës për parandalimin e koronavirusit, ka sjellë në orët e vona të mbrëmjes reagimin e ashpër të presidentit Hashim Thaçi.
Në një dalje për mediat, Thaçi gjykon se masat e marra janë antikushtetuese, sepse “ndalimi i lëvizjes së qytetarëve bëhet vetëm atëherë kur shpallet gjendja e jashtëzakonshme”, diçka që është kundërshtuar qeveria kosovare.
“Kufizimi i lirive dhe të drejtave të qytetarëve mund të bëhet vetëm nëse shapllet gjendja e jashtëzakonshme, Gjendjen e jashtëzakonshme mund ta shpallë vetëm Kuvendi i Republikës së Kosovës. Një gjendje e tillë nuk ekziston. Unë do të respektojë Kushtetutën dhe ligjet e Kosovës, pro edhe do të kujdesem që institucionet e Republikës së Kosovës të veprojnë në përputhje me Kushtetutën dhe ligjet e vendit tonë”, ka thënë Thaçi.
Thaçi i bëri thirrje popullsisë dhe forcave të rendit të mos respektojnë udhëzimet e qeverisë, si dhe deklaroi se do t’i kërkojë Gjykatës Kushtetuese anulimin e vendimit.
Me një reagim të ashpër reagoi po ashtu edhe ish-kryeministri Ramush Haradinaj, që e quajti vendimin të rrezikshëm për lirinë e personave, teksa shtoi që “çdo tendencë si kjo e sotshmja që krizat të shfrytëzohen për vendime të njëanshme për të vendosur kontroll, është veprim për diktaturë”.
Ndër masat e miratuara sot nga qeveria Kurti është ndalimi i qarkullimit të personave dhe automjeteve gjatë orës 10:00 – 16:00 dhe 20:00 – 06:00, përtej rasteve të veçanta dhe të autorizuara./Opinion.al
