Presidenti i Kosovës, Hashim Thaçi, ka ftuar sërish në takim liderin e Vetëvendosjes, Albin Kurtin. Në një letër publikuar nga mediat në Kosovë, presidenti Thaçi thotë se “me qëllim të konsultimit për të propozuar kandidatin për kryeministër për formimin e Qeverisë së Kosovës, ju ftoj sërish për takim konsultativ më datën 31 dhjetor 2019 në ora 10”.
Kujtojmë se kjo është ftesa e tretë për Kurtin pasi më 27 dhjetor ai refuzoi dy ftesat e para të presidentit Thaçi, me arsyetimin se nuk ndodhej në Prishtinë.
Në bazë të Kushtetutës, presidenti i Republikës fillimisht i propozon Kuvendit kandidatin për kryeministër, në konsultim me partinë politike që ka fituar shumicën e nevojshme në Kuvend, në këtë rast Vetëvendosjen.
Por, më 29 dhjetor, kandidati për kryeministër i Kosovës, njëherësh kryetari i Lëvizjes Vetvëvendosje, tha se datën nuk e përcakton presidenti i vendit, por varet nga partnerët e koalicionit qeverisës, pra Lidhja Demokratike e Kosovës.
“Presidenti përcakton datën e konstituimin të kuvendit dhe jo formimit qeverisë. Mua datën ma përcakton LDK, nuk bënë të ketë keqkuptime. Takimet do të ndodhin dhe do të ketë konsultime. Ndërkohë po i intensifikojmë bisedimet”, ka thënë Kurti./Opinion.al
