Presidenti i Kosovës, Hashim Thaçi dhe ai i Serbisë, Aleksandër Vuçiç, janë duke zhvilluar një takim në Shtëpinë e Bardhë. Lajmi është bërë i ditur nga Zëri i Amerikës, që nuk jep detaje mbi formatin e këtij takimi, por shkruan se më herët ishte paralajmëruar, që presidenti serb do të pritej nga këshilltari i Sigurisë Kombëtare, Robert O’Brien.
Ndonëse Thaçi dhe Vuçiç ndodhen në SHBA në takime të veçanta, më herët Presidenti serb nuk e kishte mohuar mundësinë e një takimi me presidentin Thaçi.
“Pres të shoh. Nuk kam temë për të. Pres të shoh se çfarë do të thonë mikpritësit tanë nëse kjo do të ndodhë”, kishte thënë ai para se të shkonte në Shtëpinë e Bardhë.
Zyrtarët amerikanë po i kërkojnë Kosovës që të heqë tarifat e vendosura në nëntor të vitit 2018 ndaj mallrave serbe, ndërsa Beogradit i kanë kërkuar t’i jap fund fushatës për tërheqjen e njohjeve të pavarësisë së Kosovës.
Nga ana tjetër, përmes një letre dërguar Presidentit Trump, Kryeministri I Kosovës Albin Kurti ishte shprehur se do të ishte ai që do të udhëhiqte dialogun kosovar për këto procese./ Opinion.al
