Presidenti i Kosovës Hashim Thaçi, ka patur një takim ditën e sotme me një delegacion franko-gjerman, këshilltarë të Presidentit Macron dhe Kancelares Merkel.
Ky takim do të zhvillohej për të diskutuar për parapërgatitjet lidhur me takimin e Parisit, që do të mbahet më 1 korrik.
Në përfundim të takimit Thaçi tha se dialogu me Serbinë duhet të vazhdojë pa kushte dhe se taksa ndaj produkteve serbe nuk do të hiqet.
Kreu i Shtetit të Kosovës i ka kërkuar delegacionit liberalizimin e vizave. Kjo gjë sipas Thaçit duhet të vijë pa vënë kushte të reja ndaj Kosovës sidomos jo në shkëmbim të kërkesave për tarifat apo për krijimin e asociacionit e komunave serbe në veri të vendit.
Tashmë delegacioni do të drejtohet në zyrën e Kryeministrit Haradinaj e më pas do të zhvillojë një takim edhe me kryeparlamentarin Kadri Veseli.
Delegacioni francez mësohet se përbëhet nga Alexandre Adam, zëvendës këshilltar në kuadër të Presidencës së Francës, Thomas Bertin, Shef i Misionit për Ballkan në kuadër të Ministrisë së Jashtme të Francës, si dhe nga ambasadori Didier Chabert dhe Carole Blestel-Feffer.
Kurse, delegacioni gjerman përbëhet nga Matthias Lüttenberg, Shef i Divizionit për Marrëdhënie Bilaterale për Lindjen e Mesme dhe Evropën Jugore, nga Christian Hellbach, i cili është i Dërguar Special për Evropën Juglindore dhe Turqinë pranë Ministrisë së Jashtme të Gjermanisë, si dhe nga ambasadori gjerman Christian Heldt. /Opinion.al
