Seanca solemne për betimin e Hashim Thaçit për president të vendit do të zhvillohet pa praninë e deputetëve të subjekteve opozitare. Ata thonë se asnjëherë nuk do ta pranojnë Thaçin si president i tyre
Deputetët e tri subjekteve opozitare, “Vetëvendosja”, AAK-ja dhe “Nisma”, nuk do të marrin pjesë në seancën solemne për betimin e ish-kryetarit të PDK-së, Hashim Thaçi, për president të vendit. Ata përsërisin se zgjedhja e Thaçit për president të vendit e dëshmon kapjen e shtetit nga koalicioni PDK-LDK. Ata, madje, thonë se ish-kryeministri i vendit nuk do të jetë asnjëherë president i tyre, pasi thonë se ai nuk përfaqëson unitetin e popullit.
Seanca solemne, e cila do të fillojë nga ora 11:00, nuk pritet të zgjasë shumë pasi në rend dite është vetëm një pikë, “Betimi i presidentit Hashim Thaçi”. Ndërsa në bazë të Ligjit për Presidentin e Vendit ky është teksti i betimit.
“Betohem se tërë fuqinë time do t’ia kushtoj ruajtjes së pavarësisë, sovranitetit dhe integritetit territorial të Republikës së Kosovës, sigurimit të lirive dhe të të drejtave njerëzore e qytetare, respektimit dhe mbrojtjes së Kushtetutës dhe ligjeve, ruajtjes së paqes dhe mirëqenies së të gjithë qytetarëve të Republikës së Kosovës dhe me ndërgjegje e përgjegjësi do t’i kryej të gjitha detyrimet e mia”… /gazeta Zeri
