Ylli argjentinas i Barcelonës e përfundoi “i prekur” ndeshjen e së dielës në “San Mames”, me disa goditje në këmbë, ndaj sot iu është nënshtruar testeve mjekësore në “Ciutat Esportiva”. E përditshmja spanjolle, “El Mundo Deportivo” e ka fotografuar pesë herë fituesin e “Topit të Artë” në makinën luksoze, ngjyrë blu, duke hyrë në klinikën e specializuar të klubit. “Leo Messi përfundoi “i prekur” në ndeshjen e djeshme, kundër Athletic Bilbaos. Ishte një ndeshje e fortë dhe ai mori disa goditje.
Për pasojë, sot Messi ka kaluar nëpër “Ciutat Esportiva”, që mjekët dhe fizioterapistët e Barcelonës ta “skanojnë” hollësisht. Tani për tani është duke bërë teste për të përcaktuar shkallën e problemeve të mundshme. Argjentinasi është ftuar për të luajtur dy ndeshje me Argjentinën, e para kundër Uruguait, të enjten. Drejtuesit e Barcelonës duan të jenë të vetëdijshëm për gjendjen e yllit të tyre, nëse ai mund t’i përgjigjet pozitivisht apo jo ftesës së Argjentinës,” – shkruan kjo media spanjolle.
