Një makinë me 6 bombula gazi u gjet në orët e para të së dielës, në qendër të Parisit. Prokuroria franceze që konfirmoi lajmin, njoftoi edhe ndalimin e 6 personave, 2 prej të cilëve, 34-vjeçar dhe një 29-vjeçare, ranë në pranga pasi ishin të njohur nga antiterrori vendas si persona me prirje xhihadiste.
Automjeti tip Peugeot 607, pa targa dhe drita të ndezura, ishte braktisur buzë lumit të Senës dhe shumë pranë Katedralës “Notre-Dame”. Ishte një punëtor lokali që vuri re makinën dhe njoftoi policinë, shkruan prestigjozja franceze “Le Monde”. Pas kontrollit të ushtruar, oficerët gjetën në bagazh 6 bombulat e gazit, të cilat nuk ishin të lidhura me ndonjë detonator.
Franca ndodhet në gjendje të jashtëzakonshme që zgjat që prej masakrës së 13 Nëntorit të kaluar ku u vranë 130 persona. Gjetja e automjetit me lëndë shpërthyese konfirmon tezën e prokurorëve francezë të cilët kanë ngritur prej kohësh alarmin për forma të reja sulmesh të Shtetit Islamik, përmes bombave të vendosur në vende publike.
Tv Klan
