Ekipet e shpëtimit kanë nxjerrë të gjallë pas 33 orësh një 77-vjeçar, i cili ndodhej nën rrënojat e një ndërtese të shembur në Izmir, si pasojë e tërmetit.
I moshuari është shpëtuar nga rrënojat e një ndërtese në zonën e njohur “Riza Bey” në Izmir, një nga 20 vendbanimet që u shemb gjatë tërmet.
Autoritetet turke raportojnë se deri tani 58 persona kanë humbur jetën për shkak të tërmetit në Izmir dhe 896 të tjerë kanë mbetur të plagosur.
Tërmeti i fuqishëm që goditi të premten e 30 tetorit Detin Egje midis bregdetit turk dhe ishullit grek të Samos, kishte një magnitudë 6.6 të shkallës të Rihterit. Mediat turke thanë se tërmeti u ndje në të gjithë rajonet e Egjeut dhe Marmaras, ku ndodhet edhe qyteti i Stambollit.
Tërmeti u ndje, gjithashtu, në të gjithë ishujt lindorë grekë, dhe madje edhe në kryeqytetin e Greqisë, në Athinë. Mediat greke thanë se banorët e Samos dhe ishujve të tjerë u larguan nga shtëpitë e tyre. Në ishullin Samos humbën jetën dy adoleshentë nga tërmeti, ndërsa disa të tjerë mbetën të plagosur mes tyre dhe një shqiptar./ Opinion.al
